Uttaya

Die antieke stad Uttaya was in die 1300's die hoofstad van die Siamese Koninkryk. Siam, soos wat spelers van die bordspel Risk sal weet, was die eertydse naam van Thailand, voordat dit in 1939 herdoop is tot die naam wat ons vandag nog ken.

Vandag is Uttaya grootliks bouvallig, maar in ag genome dat sommige van dié strukture reeds meer as sewehonderd jaar oud is, is dit tóg 'n indrukwekkende gesig.

Indien daar ooit 'n onomstootbare bewys was vir die feit dat toeriste soms idiote is, dan is dié kennisgewingbord presies dít. Is dit regtig nodig om uit te wys dat dit nie gepas is vir 'n man om kaalbolyf rond te loop nie? Of dat toeriste verbied word om teen die Boeddhas op te klim? Of dat dit onkuis is om in die openbaar aan jou vrou se boud te vat? Of dat jy nie jou voete moet gebruik om na iets te wys nie? Ai, nee. Tóg interessant is die vermaning in die kennisgewing regs onder: "Don't touch the head of another person, even in a friendly gesture. Thais regard the head as the highest part of the body, both literally and figuratively." Daarsy. Nou weet jy ook.

Ek het my koud geskrik toe ek dié onverwagse gesig opmerk - die kop van 'n Boeddha wat in die stam van 'n reuseboom uitgekerf is.

Hierdie beeldjie, wat lyk asof hy brandsiek is, is beplak met gold leaf. In die hoofstuk oor Mianmar brei ek in detail daaroor uit. Sien bladsy 94.

Mister Sit. Die man. Die legende. Daai vuurwa waaroor hy so liefderik streel is sy absolute trots. Verstaanbaar, siende dat dit ook die bron van sy brood en botter is.