TPSe – Tempels / pagodes / stoepas

Die coolste monnik noord van die Sahara. Te oordeel aan daardie bultende spiere, donkerbril en serp wat soos 'n hoodie om sy kop gedrapeer is, wil ek my verstout om te dink dat hy heel waarskynlik sy daaglikse Boeddhistiese mantras rap, eerder as om dit te dreunsing.

In die sweet van jou aangesig sal jy jou brood verdien. Selfs vir 'n Boeddhis geld dié Bybelse waarheid.

Nog 'n bietjie uitsig van Mount Popa af.

Mount Popa. Op die piek van hierdie futlose vulkaan tref jy die hoogs indrukwekkende Taungkalat-tempel aan. Maar voordat jy oor sy drumpel kan stap, moet jy eers 777 trappies sonder skoene en kouse kafdraf. Dis dus nie net die uitsig wat asembenemend is nie!

En hier is daardie asembenemende uitsig van Mount Popa af in al sy glorie.

Die dra van skoeisel van enige aard, in enige heilige plek in Mianmar, word streng verbied. Die resultaat van 'n besoek aan 'n tempel is dus telkens voetsole so swart soos die nag.

Elke Nuwejaar, net na die Kersgety, kom 'n donkiekardrywer deur Bagan gery. Dan drom Fanie-en-Manie op die markplein saam. Hy groet ons met die hand en hy groet ons by die naam. Met apologie aan Anneli van Rooyen.

Hierdie foto van die Shwezigon-pagode in Jangon is straks my gunstelingfoto. Nie net van my besoek aan Mianmar nie, maar van al die foto's wat ek al ooit geneem het.

Die stoepas van Kakku. Sien my verduideliking daarvan hier onder.

Sowat 2 ure per motor van Inlemeer af, vind jy Kakku – ’n antieke aanbiddingsplek wat spog met meer as 2000 stoepas, netjies in rye staangemaak. Aan die spits van elkeen van dié stoepas is ‘n klokkie gemonteer, en wanneer die wind daardeur ruis, voel dit of jy jou in ‘n droomwêreld bevind. Hierdie kalmerende klokkespel het ten doel om meditasie aan die hand te werk, maar dit kan jou ook een-twee-drie aan die slaap sus. Daar is beslis niks ... um ... kakkurig aan dié plek nie.