The Killing Fields
Die S-21-gevangenis in Phnom Penh, wat ná die val van die Khmer Rouge herdoop is tot die Tuol Sleng-gevangenis. Vandag is dit 'n museum, waar die verskriklikhede van die Kambodjaanse volksmoord van die 1970's herroep word.
Hier is hoofsaaklik "elite" gevangenes aangehou - voormalige lede van die Khmer Rouge wat in onguns by hulle voormalige kamerade verval het.
'n Swart en wit kop-en-skouers-foto is van elke verdagte met sy/haar aankoms geneem, en alle martelings is nougeset deur die bewaarders aangeteken.
Elektriese skokke, aanrandings en skynverdrinkings was aan die orde van die dag, om sodoende skulderkennings te bekom vir misdade wat die beskuldigdes gewoonlik nie gepleeg het nie. Daarna is gevangenes onder die dekmantel van die nag na Choeung Ek, 'n nedersetting buite die stad, geneem om daar wreedaardig tereggestel te word.
Choeung Ek is net een van 388 plekke waar die Khmer Rouge hulle gruweldade uitgevoer het. Die "Killing Fields" verwys kollektiewelik na al hierdie plekke, maar by Choeung Ek is die oorgrote meerderheid "vyande van die staat" vermoor.
Ná die val van die Khmer Rouge is 'n opelug-museum by Choeung Ek opgerig. Wat ek daar aanskou het, het my maag laat draai, en my nogmaals laat besef dat homo sapiens soms die wreedste spesie op hierdie planeet kan wees.
In die agtegrond van hierdie foto kan die stoepa gesien word waar honderde skedels van die slagoffers van die Khmer Rouge uitgestal word.
Verskeie massagrafte is oor die perseel heen versprei. Dié een bevat 450 slagoffers.
Die realiteite van die slagting word nie in watte toegedraai vir besoekers nie. In hierdie vertoonkas, byvoorbeeld, word die opgegraafde beendere van sommige van die oorledenes uitgestal.
'n Kunstenaarsvoorstelling van wat op aankomelinge by Choeung Ek gewag het - 'n marteling en dan 'n gewisse dood.
Die "magic tree". Aan hierdie boom is 'n luidspreker gehang waaruit klanke gestroom het om só die gekreun van die slagoffers te verdoof - dít terwyl hulle op barbaarse wyse tereggestel is. Skedels is dikwels met stomp voorwerpe verbrysel, of liggame met skerpgemaakte riete deurboor.
Hoe makaber. Tande van sommige van die slagoffers wat tydens opgrawings in die 1980's herwin is.
