Thanaka

Ontmoet my broer Jack. Hy dra thanaka, nes ek.

Hierdie rakker lyk eintlik maar soos enige kind, enige plek ter wêreld, wat sy ma se grimeersakkie in die hande gekry het!

Letterlik elke vrou en elke kind besmeer hulle gesigte op 'n daaglikse basis met dié geel balsem, tot so 'n mate dat dit eintlik 'n tikkie onrusbarend was om sóveel mense met thanakabesmeerde gesigte in die openbaar te sien!

In elke huishouding is 'n plat, ronde klipplaat wat met 'n paar druppels water besprinkel word voordat 'n stukkie boombas in sirkelbewegings daaroor geskuur word. Ná 'n minuut of wat se skuurdery verskyn daar dan 'n geel smeersel bekend as "thanaka" op die klipplaat.

Die aanbring van Thanaka word beskou as 'n sosiale aktiwiteit. Dis 'n algemene gesig om te sien hoe familielede, vriende en selfs vreemdelinge mekaar in die openbaar help om thanakawangetjies te kry.