Tennessee – Nashville – Grand Ole Opry

In Nashville luister jy óf na countrymusiek, óf jy luister na stilte. En as Countrymusiek 'n geloof was, dan was die Grand Ole Opry die tempel.

Die vertonings in die Grand Ole Opry word, soos wat dit sedert die 1920's gedoen word, regstreeks oor verskeie radiosenders uitgesaai. Dié arena, wat sitplek bied aan 6 000 siele, is altyd uitverkoop, en die blote feit dat ek 'n kaartjie kon bekom is 'n wonder.

Ek was nie die grootste aanhanger van countrymusiek nie, maar ek het gehoop dat my aand by die Grand Ole Opry my tot ander oortuigings sou bring.

"Ek's 'n countrymeisie, ek is country deur en deur. Ek sing countryliedjies wat ek al van kleintyd leer." Dis Cora Marie se gevleuelde woorde dié, maar te oordeel aan die stewels aan hulle voete, geld dié stelling ook vir die dames in dié foto.

Al die grootste countrymusieklegendes het al hulle ding op daardie beroemde verhoog gedoen - van Johnny Cash, Kenny Rogers en Dolly Parton, tot by Keith Urban en Taylor Swift (toe sy nog 'n countrymeisie was).

Die weeklikse vertoning by die Grand Ole Opry is 'n verskeidenheidskonsert, en met die verloop van die paar ure wat die vertoning geduur het, is ek inderdaad aan countrymusiek van 'n wye verskeidenheid blootgestel. Ek het altyd gedink country is maar country is maar country, maar ek kon nie meer verkeerd gewees het nie!

Riders in the Sky besig om die skare skuim om die mond te gee met hulle bluegrass - countrymusiek wat teen só 'n dolle vaart voortstoom dat dit klink of dit in fast forward gespeel word.

Ek was nooit mal oor countrymusiek nie, want ek was van mening dat dit net té hartseer is na my smaak. Ná my aand by die Grand Ole Opry, waar ek eerstehands gesien en gehoor het dat die teendeel waar is, is ek nou 'n groot aanhanger van dié musiekgenre. Heee-haaaaa!