Pjongjang – Die Juche-toring
Die Juche-toring in Pjongjang. Onder Kim Il-sung se ontelbare prestasies tel die ontwikkeling van die Juche-idee ook. Wat my betref is daar niks spesiaal aan dié "filosofie" nie, maar desnieteenstaande is dit as die amptelike ideologie van die DPRK aangeneem.
Die Juche-idee word inderdaad as só belangrik geag, dat hierdie toring ter ere daaraan opgerig is, en op die 70ste verjaarsdag van Kim Il-sung amptelik ingewy is.
Smile for the camera! Of dalk nie. 'n Revolusie is immers 'n ernstige besigheid.
As Noord-Koreane geglo kan word, dan was Kim Il-sung die grootste genie wat die aarde nog ooit bewandel het. Soos wat ek oor die volgende week en 'n half sou leer, was daar niks waarvoor dié wandelende god se hande nié reg gestaan het nie.
Die gedenkplaatjies by die Juche-toring dien as 'n “onmiskenbare” bewys van die wêreldwye ondersteuning wat daar vir dié filosofie heers.
My Franse kamermaat, Jeremy Brevet, tuur uit oor Pjongjang.
Op die keper beskou is Pjongjang maar soortgelyk aan baie ander wêreldstede, maar wanneer jy jou op grondvlak bevind, raak dit gou duidelik dat iets (of eerder báie dinge) nie pluis is nie.
Die uitsig vanaf die Juche-toring oor Pjongjang. Die kleurvolle geboue is straks die enigste titsel kleur wat die inwoners van dié stad in hulle daaglikse bestaan beleef. In die middel van dié foto kan die monument wat ter herdenking van die Koreaanse Werkersparty se stigting opgerig is, gesien word.
Kim Il-sungplein, soos gesien vanaf die anderkant van die Taedongrivier.
