‘n Kookklas met Maenoi
Slaat my dood met 'n nat vis, maar ek het geen benul waarom die eiers daar onder pienk is nie. Is dít dalk wat gebruik word om reënboogkoeke mee te bak? Ek sou nie kon sê nie.
'n Paar stapels van enige Thaise gereg - rissies, van 'n magdom vareïteite, en knoffel, knoffel, en nóg 'n bietjie knoffel. Dis verstommend om te sien hoe sommige van die plaaslike mense nonchalant aan daai rissies sit en kou, so al asof dit stukkies Quality Street is.
'n Sakkie hoenderbinnegoed tesame met 'n paar ongelegde eiers. Njam-njam.
Dis grootliks onherkenbaar, maar hierdie grillerige goeters was in 'n vorige fase van produksie maar net doodgewonde hoenders. Die heel kleintjies word pens en pootjies (heel letterlik) in diep olie gebraai en by kroeë as peuselhappies aangebied. Ja kyk, ek sal beslis eers 'n paar biere agter die rug moet hê voor ek die waagmoed aan die dag sal lê om my tande dáárin te slaan!
'n Vars kokosneut. En wanneer jy met hom klaar is, kan jy hom herwin as 'n Halloweenmasker.
En dít, vriende, is hoe 'n doplose eier lyk wanneer dit nog knus binne-in 'n hen se lyf wegkruip.
'n Trossie piesangs in die embrioniese fase.
20 Thai baht = 10 SA rand. Nie 'n slegte prys vir 'n bakkie vars vis nie.
'n Varkgestopte koolrolletjie in wording. Ook maar goed ek is nie gedwing om op daardie stadium 'n tongtippietoets uit te voer nie, want soos hy daar lê lyk hy maar onaptydwekkend.
Op julle merke, gereed ... kook! 'n Handvol van die sewe-en-veertig bestanddele waaruit die vier disse wat ek opgetower het bestaan het.
Saam met die twee Deense mageirokofobe wat óók gehoop het om hulle mageirokofobie in Maenoi se kombuis te genees. Hulle name ontgaan my nou, maar siende dat Hans Christian Andersen ook van Deense afkoms was, kan ons hulle seker maar Die Kleine Meermin en Die Bliksoldaatjie doop.
Noem my sommer Gordon Ramsey. Of nie.
Bo, links - varkgestopte koolrolletjies. Bo, regs - Thaise rooi kerrie met hoender. Onder, links - geroerbraaide hoender-en-kasjoeneute. Onder, regs - rysnoedels met vark en sojasous.
