Arizona – Monument Valley

Die Monument Valley Navajo Tribal Park, in Arizona, is een van die mees gefotografeerde plekke op aarde.

Hierdie drietal is so eie aan Monument Valley as wat die Eiffeltoring aan Parys is. Dis 'n wêreldbekende baken, en ek kon beswaarlik my oë daarvan wegskeur.

Sonsopkoms oor Monument Valley.

Hierdie is waarskynlik die beste uitsig wat ek nog ooit vanaf 'n hotelkamer se balkon gehad het. Die hotel se naam was "The View" - nie moeilik om te sien waarom nie!

Hier kan die stowwerige paadjie gesien word wat vir 17 myl deur die park kronkel. Slegs 25 privaatkarre word op 'n slag binne die park toegelaat. Geen besoeker hoef dus 'n verkeersopheenhoping te vrees nie.

Monument Valley is waar John Wayne sy cowboyflieks gemaak het. Enigiemand wat al 'n regte-egte Hollywood-Western gesien het, sal hierdie landskap herken. Wanneer ek dié foto bekyk, begin die temalied van The Good, The Bad and The Ugly onmiddellik in my kop te speel.

Die Olifant - dís die naam wat hulle aan hierdie sandsteen-Meesterstuk gegee het.

Anderkant die berg. Fliekvlooie sal ook dié beeld herken, want dít is mos waar Forrest Gump se laaaang draffie uiteindelik geëindig het. Nadat hy vir maande lank gedraf het, sonder om presies te weet waarom, het sy gô op hierdie presiese plek uitgeraak.

Onbedoelde spelfout? Hierdie bord moet vermoedelik sê "we're open". Maar weens die spelfout sê dit "were open" - ons wás oop ... wat op grond van die getuienis in dié foto dalk nader aan die waarheid is.

Nie almal kom lewendig terug van 'n besoek aan Monument Valley nie!