Mianmar se mense
Hierdie kunswerke, wat ek in ruil vir 'n handvol Mianmese kyats bekom het, pryk deesdae teen een van die mure van my klaskamer.
Dans, apie, dans? Nie alvorens jy 'n paar kyats in my blikkie gedruk het nie.
Manie het 'n grappie vertel, en dié tempel het hom ... gekraak daarvoor.
Vlugbal met voete. Soos die volleyball wat ons ken, maar die bal word geskop, eerder as geslaan. Dit gee ook 'n heel nuwe betekenis aan die term "vlugvoetig"!
Ja, wragtig, die hangertjie wat dié bra om sy nek dra is aansienlik meer intimiderend as die goue kettinkies wat Amerikaanse rappers dink van húlle hardebaarde maak.
Jou wasgoed kom sweerlik vuiler aan die anderkant uit nadat dit deur dáái wasmasjien getrek is.
‘n Visserman op Inlemeer, midde-in die uitvoer van ‘n visvangtegniek wat uniek is aan dié deel van die wêreld. Omdat die meer besaai is met riete en ander plantgewasse, deug ‘n gewone visstok of vissersnet nie daar nie. Derhalwe balanseer die manne hulself op die verste punt van die skuit, om só ‘n goeie uitsig op moontlike prooi in die water te kry. Wanneer ‘n potensiële slagoffer bespeur word, word die kegel wat die visserman in sy hand hou in die water geplons, en só bevind ta hom dan in ‘n klein tronkie waaruit hy nie kan ontsnap nie. Hierdie tegniek is só eie aan die vissers van Inlemeer, dat dit selfs op aandenkings soos yskasmagnete verskyn.
Mr Bones - die Mianmese weergawe.
Dit behoort as geen verrassing te kom nie dat daar na dié vroue verwys word as "die langnekvroue van Mianmar". Hulle is lede van die Kayan-stam, wat meen dat die lang nekke hul vroue meer aantreklik maak. Ek verskil egter heftig met dié aanspraak. Jigggg. Ironies genoeg het die gebruik om hulle nekke met koperringe uit te rek onder die vroue van dié stam ontstaan omdat dit hulle mínder aantreklik sou maak vir vyandiggesinde stamme, wat dan die kans op ontvoering deur hierdie vyande sou verskraal. Nou ja, dáármee kan ek wél akkoord gaan.
Vroue werskaf in 'n fabriekerige werkswinkel, waar tradisionele Mianmese sigare met die hand gerol word.
'n Drywende dorpie op Inlemeer. Daar is talle sulke nedersettings te vinde in dié meer. Dit word op stelte gebou, en kan net met die gebruik van 'n skuit bereik word. Die motoraangedrewe skuit in dié foto het behoorlik by ons verbygevlieg!
En hier is die eindproduk - groen stokkies vol kanker. Ek het 'n paar teue gegee aan een van dié outjies, maar ek rook eerder my eie vuil sokkies voordat ek weer my lippe aan een van dáái goed slaan.
Veiligheidsgordels? Watwou! Hierdie taxibestuurder het beweer dat veiligheidsgordels oorbodig sou wees, aangesien die jin wat op dié stukkie rubber uitgebeeld word, hom teen alle gevare van die oop pad sou beskerm. Ek het egter meer vertroue in die tokkelossie as in dié kontrepsie.
