Arizona – Grand Canyon
Die Grand Canyon word alom as die nommer een toeriste-aantreklikheid in die VSA beskou. Die Arizona Toerisme-agentskap is klaarblyklik deeglik bewus van dié feit, dié dat hulle Arizona skoon herdoop het na die "Grand Canyon state".
Icy trail. Crampons recommended. Vir dié wat nie weet nie - "crampons" is groot rubberkouse met staaltande wat jy bo-oor jou skoene aantrek sodat jy nie op 'n bevrore oppervlak gly nie. Ek het nié crampons gehad nie - 'n feit wat ek eerlank sou berou ...
Geen foto kan reg laat geskied aan die verbysterende gesig wat jou begroet wanneer jy langs dié canyon staan nie. Dis regtigwaar iets wat jy net ten volle kan waardeer wanneer jy dit met jou eie oë gadeslaan.
Verbeel jou jy staan op 'n gelyk stuk aarde. Probeer nou om 'n punt op die horison te identifiseer wat sowat vyf-en-twintig kilometer van jou af weg is. Verbeel jou nou dat die grond tussen jou en daardie denkbeeldige punt in die verte eenvoudig wegsink in die aarde, in 'n opeengestapelde netwerk van kranse, valleie en 'n rivier. Dít is wat die Grand Canyon is.
Die Coloradorivier het met die verloop van sowat twee miljoen millennia die rotse laag vir laag weggekalwe, en vandag kan elkeen van daardie lae duidelik gesien word. Wat 'n grootse gedagte om te dink dat een so 'n laag maklik 'n miljoen jaar se geskiedenis verteenwoordig.
Ek het een van die staproetes teen die canyon se wand af begin volg. Dit was egter op dié paadjie dat ek hardop gewens het dat ek tóg maar crampons aan my skoene gehad het. Dit was soos om op 'n ongelyke ysskaatsbaan te probeer loop, en nadat ek 'n handvol kere hárd met Moeder Aarde kennis gemaak het, het ek maar eerder die aftog geblaas en teruggekeer na die boonste rand van die canyon.
Die uitgerekte skaduwees wat tydens sonsopkomste en -ondergange sigbaar is, het my 'n belangrike lewensles geleer. Sien bladsy 215 vir besonderhede.
Voor die aangesig van die canyon voel enige mens klein. Weens die oorrompelende grootsheid van dié ontsagwekkende natuurverskynsel is ek gedwing om opnuut my plek in die uitspansel te oorweeg ...
