Everest se basiskamp
Ek was op besoek aan Tibet, daardie kontroversiële provinsie van China. Nadat ek 'n dag in die hoofstad, Lhasa, spandeer het om te akklimatiseer tot die papierdun lugdruk, het ek my in die maag van 'n minibus bevind - onderweg na Everest se basiskamp!
'n Simptoom van die bose pie-klus wat ons rit na die basiskamp frustrerend tydrowend gemaak het. Vir 'n volle verduideliking - sien bladsy 52.
Hierdie silindriese toestelle is gebedswiele, en dit kom wydverspreid voor in die Boeddhistiese wêreld, nie net in Tibet nie. Hierdie wiele bevat inskrywings van Boeddhistiese mantras, oftewel gebede. Daar word geglo dat die draai van ‘n gebedswiel dieselfde effek het as wanneer die mantras wat daarop verskyn mondelings voorgedra word.
Die Friendship Highway, wat Tibet met sy buurman in die Ooste, Nepal, verbind.
Die Uile in Tibet. Van links na regs - Nemo, Matan, ons gids, ek, Luigi en Kim.
In Tibettaans staan Berg Everest bekend as Mount Qomolangma (Choh-mo-lung-m). In Afrikaans beteken dit “Die godin-moeder van die wêreld”.
En daar is hy! Berg Everest in al sy/haar glorie.
Dit was op dié punt dat my emosies die oorhand gekry het, oor al die goeie en slegte dinge in die ou lewe ...
... maar gelukkig was my bende byderhand om troos te bied, en die onverwagse trane het spoedig weer plek gemaak vir 'n groot, gloeiende glimlag.
Die lodgers' village, by Berg Everest se basiskamp.
Die binne-aansig van 'n sogenaamde teahouse - 'n kruising tussen 'n tent en 'n hut waarin besoekers aan die basiskamp gehuisves word. Die eiergebraaide rys wat ek vir aandete genuttig het, en wat later in temperature onder vriespunt op die grond buite die teahouse beland het, is gaargemaak op die koolstoof wat links op die foto gesien kan word.
'n Kannetjie suurstof - 'n broodnodige toevoeging tot enige basiskampbesoeker se oornagtassie.
Ek en Matan Abramovitz - 'n voormalige offisier in die Israelse weermag wat ná afloop van sy verpligte diensplig op reis gegaan het en nog nooit weer teruggekyk het nie.
Kim, die man met die dubbelloopvan, peinsend na afloop van ons besoek aan Berg Everest. Daardie pankop het gevolg op elf maande se elke dag 'n valhelm dra, toe hy van Londen tot in Beijing met 'n motorfiets gery het - 'n feit wat ek uitermate indrukwekkend gevind het.
