Colorado – Denver
Colorado is tornadowêreld. As ek die ding so kyk, wil dit vir my lyk asof die mans se ablusiegeriewe ook diens doen as 'n skuilplek teen tornado's. Vreemde raad, skat ek, aangesien jy jou dalk daarbinne kan vasloop teen 'n tornado van 'n ander soort.
Ek het op en af in hierdie straat geloop, maar ek kon nie 'n enkele drankwinkel opspoor nie.
Colorado was een van die heel eerste Amerikaanse deelstate wat die rekreasionele gebruik van cannabis gewettig het. Cannabis Station is een van dosyne winkels in Denver waar Die Krui wettiglik aangeskaf kan word. Dit gee terselfdertyd ook sommer nuwe betekenis aan die gesegde: "Ek was op 'n stasie."
Comedy Works? Ja, komedie werk beslis. In China vermy ek komedieklubs, aangesien al die grappies vir my dieselfde klink, maar ek kon nie die kans laat verbyglip om by dié een te gaan draai nie.
Die vier komediante wat ons daai aand vermaak het was almal baie snaaks. En nou sê ek nie hulle was humoristies nie, ek sê hulle was snaaks. Elkeen het dieselfde "uniform" gedra, en hulle het almal hulle grappies baie hard vertel - nisgrappies wat jy eintlik net kan vang indien jy ook in Denver bly. Maar lag is vir seker die beste medisyne, en ek het tóg daai aand 'n goeie dosis daarvan ingekry.
Ek verduidelik op bladsy 181 van my boek hoe dit gekom het dat ek my bevind het by dié ekspo vir "groen" besighede. Dit was lank voordat die konstitusionele hof van Suid-Afrika gelas het dat daggagebruikers in die privaatheid van hulle eie huise dagga mag kweek, besit en gebruik. Dat papegaaislaai só oop en bloot bespreek kon word, was vir my 'n hoogs amusante nuutjie.
Dié was nie die plek vir die ou met die dreadlocks wat by jou plaaslike vulstasie 'n matchbox vol madjat aan jou wil afsmeer nie. Dit was 'n plek vir groot, georganiseerde besigheid.
By dié vreemde ekspo was daar stalletjies van besighede wat elke aspek van die cannabisbedryf dek - van saad tot daad. Gradujuana, byvoorbeeld, is 'n personeelwerwingsagentskap wat uitsluitlik werksoekers vir poste in die cannabisbedryf op hulle boeke het.
Raad word aangebied. Use it / don't use it.
Cannabis Labels is 'n maatskappy wat aan die grafiese ontwerp-behoeftes van besighede in die cannabisbedryf voldoen.
