Die tempels van Angkor – Siem Reap
Die tempels van Angkor is die nalatenskap van die Angkorse Ryk, wat tussen 800 en 1300 oor 'n groot deel van Suidoos-Asië gestrek het. Dis 'n enorme kompleks met eindelose tempels wat verspreid lê oor 'n oppervlak van 400 vierkante kilometer. Die hooftempel, en ook die juweel in die kroon, is Angkor Wat. Hierdie is die ingang tot daardie hoogs indrukwekkende struktuur.
Die Bayon Tempel, oftewel die Tempel van Gesigte. Dis in die 13de eeu laat bou deur die destydse koning van die Khmers - Jayavarman VII. Dit het 42 torings, en meer as 200 vriendelike gesigte loer vreedsaam na besoekers. Elkeen van daardie gesigte is 'n versinnebeelding van vriend Jayavarman s'n - om die alomteenwoordigheid van die koning te beklemtoon. Kyk hoe kyk hy vir my.
Ta Prohm, die tempel waar die oerwoud begin het om sy eiendomsreg terug te eis. Dié tempel is nóg een wat deur koning Jayavarman VII laat bou is - ter ere aan sy ma. Sy het, vermoedelik, nadat die bouwerk eers voltooi was, nooit weer 'n present op Moedersdag ontvang nie.
Ta Prohm het in die meer onlangse verlede beroemdheid verwerf toe Angelina Jolie, in haar rol as Lara Croft, daar rondgehardloop het.
Wie wil nou in 'n bedompige toektoek sit, as jy die omgewing kan betrag vanaf die rug van 'n olifant? In die agtergrond kan een van die vyf ingangshekke na die tempelkompleks gesien word.
Angkor Wat - vanuit 'n ander aansig. As die meisie daar regs nog één sak moes dra, het haar rug sweerlik ingegee.
Instagram vs Realiteit. Instagram - 'n sonsopkoms oor Angkor Wat ...
Realiteit - honderde mense wat mekaar verdring om hul Instagram-oomblik op kamera te verewig. En spoedig wémel Instagram van foto's van dáái sonsopkoms oor Amgkor Wat. ;-)
In Kambodja skop die entrepreneursinstink vroeg in. Noodgedwonge, só. En alles, maar álles kos "whan dolla". Sien bladsy 160 vir die volle verduideliking.
Nie almal stel egter daarin belang om jou van jou $1-note te verlos nie. Hier en daar kan jy darem nog ietsie gratis kry - soos 'n breë glimlag en 'n stuitige danspassie.
Vir die Boeddhiste van Angkor hóéf jy nie te betaal nie, maar jy kan as jy wil.
Die Kambodjaanse vroue se teenvoeter vir die hitte is om hulself van kop tot tone in wollerige klerasie te tooi, wolkouse en plakkies en al.
Dís nou hoe nuutgevonde nederigheid in 'n foto lyk. Nadat ek en Tamas ons slim gehou het deur daarop aan te dring om die tempels van Angkor per fiets te deurkruis, moes ons die aftog voor die ongenaakbare hitte blaas, en uiteindelik het my gehiirde fiets sy weg terug na die beskawing in die maag van 'n toektoek gevind!
Dag twee - op dié dag het ons die fietse ver weg gaan bêre, en die kompleks deurkruis in die relatiewe gemak wat 'n toektoek bied.
"You hot?" het sy retories gevra. Ek het haar nie geantwoord nie. Nie omdat ek nie wou nie, maar omdat ek weens die versengende hitte nie 'n woord oor my lippe kon kry nie.
